КАНОН ПОКАЯННЫЙ КО ГОСПОДУ НАШЕМУ ИИСУСУ ХРИСТУ

Глас 6-й

Песнь 1

Ирмос: Яко по суху пешешествовав Израиль, по бездне стопами, гонителя фараона видя потопляема, Богу победную песнь пойм, вопияше.

Припев: Помилуй мя, Боже, помилуй мя.

Ныне приступйх аз грешный и обремененный к Тебе, Владыце и Богу моему; не смею же взирати на небо, токмо молюся, глаголя: даждь ми, Господи, ум, да плачуся дел моих горько.

Припев: Помилуй мя, Боже, помилуй мя.

О, горе мне грешному! Паче всех человек окаянен есмь, покаяния несть во мне; даждь ми, Господи, слезы, да плачуся дел моих горько.

Слава: Безумие, окаянне человече, в лености время губиши; помысли житие твое, и обратися ко Господу Богу, и плачися о делех твоих горько.

И ныне: Мати Божия Пречистая, воззри на мя грешнаго, и от сети диаволи избави мя, и на путь покаяния на­стави мя, да плачуся дел моих горько.

Песнь 3

Ирмос: Несть свят, якоже Ты, Господи Боже мой, вознесый рог верных Твоих, Блаже, и утвердйвый нас на камени испове­дания Твоего.

Припев: Помилуй мя, Боже, помилуй мя.

Внегда поставлени будут престоли на судйщи страшнем, тогда всех человек дела обличатся; горе тамо бу­дет грешным, в муку отсылаемым; и то ведущи, душе моя, покайся от злых дел твоих.

Припев: Помилуй мя, Боже, помилуй мя.

Праведницы возрадуются, а грешнии восплачутся, тогда никтоже возможет помощи нам, но дела наша осудят нас; темже прежде конца покайся от злых дел твоих.

Слава: Увы мне великогрешному, иже делы и мысльми осквернйвся, ни капли слез имею от жестосердия; ныне возникни от земли, душе моя, и покайся от злых дел твоих.

И ныне: Се, взывает, Госпоже, Сын Твой, и поучает нас на доброе, аз же грешный добра всегда бегаю; но Ты, Милостивая, помилуй мя, да покаюся от злых моих дел.

Седален, глас 6й

Помышляю день страшный и плачуся деяний моих лукавых: како отвещаю Безсмертному Царю, или коим дерзновением воззрю на Судию, блудный аз? Благоутробный Отче, Сыне Единородный и Душе Святый, помилуй мя.

Слава, и ныне: Богородичен

Связан многими ныне пленйцами грехов и содержим лютыми страстьми и бедами, к Тебе прибегаю, моему спа­сению, и вопию: помози ми, Дево, Мати Божия.

Песнь 4

Ирмос: Христос моя сила, Бог и Господь, честная Церковь боголепно поет, взывающи от смысла чиста, о Господе празднующи.

Припев: Помилуй мя, Боже, помилуй мя.

Широк путь зде и угодный сласти творйти, но горько будет в последний день, егда душа от тела разлучатся будет: блюдйся от сих, человече, Царствия ради Божия.

Припев: Помилуй мя, Боже, помилуй мя.

Почто убогаго обйдиши, мзду наемничу удержуеши, брата твоего не любиши, блуд и гордость гониши? Остави убо сия, душе моя, и покайся Царствия ради Божия.

Слава: О, безумный человече, доколе углебаеши, яко пчела, собирающи богатство твое? Вскоре бо погибнет, яко прах и пепел: но более взыщи Царствия Божия.

И ныне: Госпоже Богородице, помилуй мя грешнаго, и в добродетели укрепи, и соблюди мя, да наглая смерть не похитит мя неготоваго, и доведи мя, Дево, Царствия Божия.

Песнь 5

Ирмос: Божиим светом Твоим, Блаже, утренюющих Ти души любовию озари, молюся, Тя ведети, Слове Божий, истиннаго Бога, от мрака греховнаго взывающа.

Припев: Помилуй мя, Боже, помилуй мя.

Воспомянй, окаянный человече, како лжам, клеветам, разбою, немощем, лютым зверем, грехов ради порабощен есй; душе моя грешная, того ли восхотела еси?

Припев: Помилуй мя, Боже, помилуй мя.

Трепещут ми уди, всеми бо сотворих вину: очима взираяй, ушима слышан, языком злая глаголяй, всего себе геенне предаяй; душе моя грешная, сего ли восхо­тела еси?

Слава: Блудника и разбойника кающася приял еси, Спасе, аз же един леностию греховною отягчйхся и злым делом поработихся; душе моя грешная, сего ли восхо­тела еси?

И ныне: Дивная и скорая помощнице всем челове­ком, Мати Божия, помозй мне недостойному, душа бо моя грешная того восхоте.

Песнь 6

Ирмос: Житейское море, воздвигаемое зря напастей бурею, к тихо­му пристанищу Твоему притек, вопию Ти: возведи от тли живот мой, Многомилостиве.

Припев: Помилуй мя, Боже, помилуй мя.

    Житие на земли блудно пожих и душу во тьму предах, ныне убо молю Тя, Милостивый Владыко: свободй мя от работы сея вражия, и даждь ми разум творйти волю Твою.

Припев: Помилуй мя, Боже, помилуй мя.

Кто творит таковая, якоже аз? Якоже бо свиния лежит в калу, тако и аз греху служу. Но ты, Господи, исторгни мя от гнуса сего и даждь ми сердце творити заповеди Твоя.

Слава: Воспрянй, окаянный человече, к Богу, воспомянув своя согрешения, припадая ко Творцу, слезя и стеня; Той же, яко милосерд, даст ти ум знати волю Свою.

И ныне: Богородице Дево, от вйдимаго и невйдимаго зла сохрани мя, Пречистая, и приимй молитвы моя, и донеси я Сыну Твоему, да даст ми ум творйти волю Его.

Кондак

Душе моя, почто грехами богатееши, почто волю диаволю творйши, в чесом надежду полагавши? Престани от сих и обратйся к Богу с плачем, зовущи: милосерде Господи, помилуй мя грешнаго.

Икос

Помысли, душе моя, горький час смерти и страшный суд Творца твоего и Бога: Ангели бо грознии поймут тя, душе, и в вечный огнь введут: убо прежде смерти по­кайся, вопиющи: Господи, помилуй мя грешнаго.

Песнь 7

Ирмос: Росодательну убо пещь содела Ангел преподобным отроком, халдеи же опаляющее веление Божие, мучителя увеща вопйти: благословен еси, Боже отец наших.

Припев: Помилуй мя, Боже, помилуй мя.

Не надейся, душе моя, на тленное богатство и на не­праведное собрание, вся бо сия не веси кому оставиши, но возопйй: помилуй мя, Христе Боже, недостойнаго.

Припев: Помилуй мя, Боже, помилуй мя.

Не уповай, душе моя, на телесное здравие и на скоромимоходящую красоту, вйдиши бо, яко сйльнии и младйи умирают; но возопйй: помилуй мя, Христе Боже, недостойнаго.

Слава: Воспомянй, душе моя, вечное житие, Царство Небесное, уготованное святым, и тьму кромешную и гнев Божий злым, и возопйй: помилуй мя, Христе Боже, недостойнаго.

И ныне: Припади, душе моя, к Божией Матери и помолися Той, есть бо скорая помощница кающимся, умолит Сына Христа Бога, и помилует мя недостойнаго.

Песнь 8

Ирмос: Из пламене преподобным росу источил еси и праведнаго жертву водою попалил еси: вся бо творйши, Христе, токмо еже хотети. Тя превозносим во вся веки.

Припев: Помилуй мя, Боже, помилуй мя.

Како не имам плакатися, егда помышляю смерть, вйдех бо во гробе лежаща брата моего, безславна и бе­зобразна? Что убо чаю, и на что надеюся? Токмо даждь ми, Господи, прежде конца покаяние. (Дважды)

Слава: Верую, яко прийдеши судйти живых и мерт­вых, и вси во своем чину станут, старии и младйи, влады­ки и князи, девы и священницы; где обрящуся аз? Сего ради вопию: даждь ми, Господи, прежде конца покаяние.

И ныне: Пречистая Богородице, приимй недостойную молитву мою и сохрани мя от наглыя смерти, и даруй ми прежде конца покаяние.

Песнь 9

Ирмос: Бога человеком невозможно вйдети, на Негоже не смеют чини Ангельстии взирати; Тобою же, Всечйстая, явйся челове­ком Слово Воплощенно, Егоже величающе, с небесными вой Тя ублажаем.

Припев: Помилуй мя, Боже, помилуй мя.

Ныне к вам прибегаю, Ангели, Архангели и вся небесныя силы, у Престола Божия стоящий, молитеся ко Творцу своему, да избавит душу мою от муки вечныя.

Припев: Помилуй мя, Боже, помилуй мя.

Ныне плачуся к вам, святии патриарси, царие и прорбцы, апостоли и святйтелие и вси избранник Христовы: помозите ми на суде, да спасет душу мою от силы вражия.

Слава: Ныне к вам воздежу руце, святйи мученицы, пустынницы, девственницы, праведницы и вси святйи, молящийся ко Господу за весь мир, да помилует мя в час смерти моея.

И ныне: Мати Божия, помозй ми, на Тя ей льне надею­щемуся, умоли Сына Своего, да поставит мя недостойнаго одесную Себе, егда сядет судяй живых и мертвых, аминь.

Молитва

Владыко Христе Боже, Иже страстьмй Своими страсти моя исцелйвый и язвами Своими язвы моя уврачевавый, даруй мне, много Тебе прегрешившему, слезы умиления; страстворй моему телу от обоняния Животворящаго Тела Твоего, и наслади душу мою Твоею Честною Кровию от горести, еюже мя сопротйвник напой; возвыси мой ум к Тебе, долу поникший, и возведи от пропасти погибели: яко не имам покаяния, не имам умиления, не имам слезы утешительныя, возводящия чада ко своему наследию. Омрачйхся умом в житейских страстех, не могу воззрети к Тебе в болезни, не могу согретися слезами, яже к Тебе любве. Но, Владыко Господи Иисусе Христе, сокровище благих, даруй мне покаяние всецелое и сердце люботрудное во взыскание Твое, даруй мне благодать Твою и об­нови во мне зраки Твоего образа. Оставих Тя, не остави мене; изыди на взыскание мое, возведи к пажити Твоей и сопричти мя овцам избраннаго Твоего стада, воспитай мя с ними от злака Божественных Твоих Таинств, молитва­ми Пречистыя Твоея Матере и всех святых Твоих. Аминь.